काँगडी भाषा व्याकरण - १

                                         (फोटो इंटरनेट से साभार)

काल (टेन्स)

काल  दा मतलब हौंदा ― समें जाँ टैम।  क्रिया दे जिस रूपे ते कम्म करने दे टैमें दा पता चलदा तिस्सेयो काल ग्लाँदे।  मलतब जिस रूपे ते क्रिया दे हौंणे दे समैं दा पता लग्गे सैही काल हौंदा। जिंञा कि ―

•मैं खाणा खाह्दा।

•मैं खाणा खा दा।

•मैं खाणा खाणा है।

इन्हाँ तिन्नाँ वाक्याँ च कर्ता (मैं) कनैं क्रिया (खाणा) इक्को ही हन्न अपर करने दा टैम बखरा-बखरा है। ‘खाह्दा’ मतलब खायी लिह्या (भूत काल), ‘खा दा’ मतलब खाणा लग्गेह्या (वर्तमान काल) कनैं ‘खाणा है’ मतलब अतिह्यैं खाणा है (भविक्ख काल)।

इस तरहाँ ‘काल’ दियाँ तिन्न किस्माँ हौंदियाँ हन्न ―

(क)   भूत काल।

(ख)   वर्तमान काल।

(ग)    भविक्ख काल।

(क)   भूतकाल―

भूतकाल=भूत+काल। भूत मतलब बीती चुकेह्या कनै काल मतलब समैं - बीती चुकेह्या समैं। 

क्रिया दा सैह् रुप जिसते बीतेह्यो वक्ते च कम्म दे हौयी जाणे दा पता लग्गे, भूतकाल क्हांदा है।  मिसाल दे तौर पर, “मैं फौजा च रिह्या था।”

भूतकाल दी पच्छैण ― क्रिया सोगी ‘ह्या’ जाँ वाक्य दा अखीरी अक्खर ‘था’, थियाँ जाँ ‘है’ हौंदा है।  कुत्थी-कुत्थी इन्हाँ दा हौंणा  लाजिमी नीं।

भूतकाल दियाँ किसमां ―

भूतकाल दियाँ छे किसमां हौंदियाँ हन्न -

(i)     सादा भूतकाल

(ii)    हुणका भूतकाल

(iii)   पूरा भूतकाल

(iv)   अधूरा भूतकाल

(v)    संदिग्ध भूतकाल

(vi)   शर्ती भूतकाल

(i)     सादा भूतकाल:- क्रिया दे जिस रूपे ते कम्मे जो आमतौरे पर बीतेह्यो वक्ते च हौंणे दा पता लग्गे, तिस्सेयो सादा भूतकाल ग्लाँदे हन्न। जिंञा -

•रामू आह्या।

•सरोज गइह्यो।

•छौरुआँ रौल़ा पाह्या।

(ii)    हुणका भूतकाल:- क्रिया दे जिस रूपे ते एह् पता चल्ले कि कम्म हुण ही पूरा होह्या है, तिसजो हुणका भूतकाल बोलदे हन्न। जिंञा -

•मैं केल़ा खादह्या है।

•सैह् पैदल आइह्यो है।

•मुन्नू सोयी करी उठेह्या है।

(iii)   पूरा भूतकाल:- क्रिया दे तिस रूपे जो पूरा भूतकाल ग्लाँदे, जिसते साफ-साफ पता चलदा कि कम्मे हौह्यो जो काफी टैम बीती  गिह्या।  जिंञा -

•अंग्रेजां भारते पर राज कित्ता था।

•मुंशी प्रेमचंद होराँ उपन्यास लिक्खे थे।

•तिन्नी बलवीरे जो कुट्टेया था।

(iv)   अधूरा भूतकाल:- जिस क्रिया ते एह् पता चल्ले कि कम्म भूतकाल च पूरा नीं हौया था - अतिह्यें हौआ दा है, तिस्सेयो अधूरा भूतकाल बोलदे हन्न। जिंञा -

•दीक्षा सुतिह्यो थी।

•राजू गीत गाह्दा था।

•दादी कहाणी सुणाह्दी थी।

इन्हाँ वाक्याँ दियाँ क्रियाँ ते पता लग्गादा कि कम्म भूतकाल च शुरू हौयी करी अज्हैं  पूरा नीं हौह्या। इस वजह ते एह् अधूरे भूतकाल दियाँ क्रियाँ हन्न।

(v)    संदिग्ध भूतकाल:- भूतकाल दी जिस क्रिया ते कम्मे दे पूरा हौंणा नीं बज्झोये मतलब पूरा हौंणे पर शक रही जाए, तिस्सेयो संदिग्ध भूतकाल ग्लाँदे हन्न। जिंञा -

•बस छुटी गइह्यो हौंगी।

•तैं गाह्या हौंगा।

•दुकानाँ बंद हौयी चुकिह्याँ हौंगियाँ।

(vi)   शर्ती भूतकाल:- जेकर  भूतकाल च इक क्रिया दे हौंणे जाँ नीं हौंणे पर दूजिया क्रिया दा हौंणा जाँ नीं हौणा डिपेंड करदा हौये ताँ सैह् ‘शर्ती भूतकाल’ क्रिया ग्लोंदी है। जिंञा -

•जेकर असाँ मिली-जुली कम्म कित्तेह्या हौंदा ताँ काँगडी भाषा दा व्याकरण बणेह्या हौंदा।

•जेकर बरखा हौंदी ताँ फसल बद्धिया हौंदी।

•जे तुसाँ मेहनत कित्तिह्यो हौंदी ताँ पास हौयी जाँदे।

(ख)   वर्तमान काल―

क्रिया दा सैह् रूप जिसते कम्म दे हुणकणे समैं च हौंणे दा पता चल्ले तिस्सेयो वर्तमान काल ग्लाँदे हन्न। जिंञा -

•रिड़कू सोआ-दा है।

•मैं लिक्खा दा।

•तुसाँ क्या करा दे हन्न?

उप्पर लिक्खेयाँ वाक्याँ च, कम्म दे वर्तमान च हौंणे पता चल्ला-दा। वर्तमान काल दी पच्छैण वाक्य दे अंत च — दा, दा है, दी है, दे हन्न बगैरा अक्खराँ जो दिक्खी नैं करी सकदे हन्न।

वर्तमान काल दियाँ किसमां ―

वर्तमान काल दियाँ छे किसमां हौंदियाँ हन्न, जेह्ड़ियाँ इस तरहाँ हन्न -

(i)      सादा वर्तमान काल

(ii)     हुणका वर्तमान काल

(iii)    पूरा वर्तमान काल

(iv)   अधूरा वर्तमान काल

(v)    संदिग्ध वर्तमान काल

(vi)    संभाव्य वर्तमान काल

(i)     सादा वर्तमान काल:- क्रिया दा सैह् रूप जिसते क्रिया दा वर्तमान काल च हौंणा पाया जाए, सादा वर्तमान काल क्हाँदा है।  क्रिया दे जिस रूपे ते, आमतौर पर, एह् बज्झोये कि कम्म हौंणे दा टैम वर्तमान च है, न कम्मे दे अधूरे हौंणे बखी इशारा मिल्ले न ही शके दी गुंजाइश हौये, तित्थू सादा वर्तमान हौंदा है।  

जिन्हाँ वाक्याँ दे अंत च दा, दी, दा है, दी है, दे हन्न बगैरा ओंदे, सैह् सादा वर्तमान काल हौंदे हन्न। जिंञा -

•पंछी अम्बरे च उड़दा है।

•अनुपमा कविता लिक्खदी है।

•राजू फुटबॉल खेलदा है।

(ii)     हुणका वर्तमान काल:- क्रिया दे जिस रूपे ते एह् पता चलदा कि कम्म वर्तमान च हौआ दा, तिस्सेयो हुणका वर्तमान बोलदे हन्न। जिंञा - 

•मैं लिक्खा दा।

•तुसां क्या बोला-दे?

•सैह् हस्सा दे।

(iii)    पूरा वर्तमान काल:-.क्रिया दे जिस रूपे कम्मे दे हुण हौंणे दा पता चलदा है, तिस्सेयो पूरा वर्तमान काल बोलदे हन्न। इसते कम्म पूरा हौयी जाणे दा पता चलदा। जिंञा -

•मैं फल़ खाह्दे।

•असां कीली-डंडा खेल्या।

•सैह् मेरे घरैं आह्या।

(iv)   अधूरा वर्तमान काल:- क्रिया दे जिस रूप ते कम्मे दे लगातार हौंणे दा पता चलदा है, तिसजो अधूरा वर्तमान काल ग्लाँदे हन्न। जिन्हाँ वाक्याँ दे अंत च दा, दी, दे, दा है, दी है, दे हन्न बगैरा औंदे हन्न, सैह् अधूरा वर्तमान काल हौंदे हन्न। जिंञा - 

•रामू खेला-दा।

•अवनी गाणा गा-दी।

•सैह् घरे जो जाह्दा।

(v)    संदिग्ध वर्तमान काल:- क्रिया दे जिस रूपे ते वर्तमान च कम्मे दे हौंणे जाँ करने पर शक हौये, तिस्सेयो संदिग्ध वर्तमान काल ग्लाँदे हन्न। मतलब जिन्हाँ वाक्याँ दे अंत च दा हौंगा, दी हौंगी, दे हौंगे बगैरा औंदे हन्न, सैह् संदिग्ध वर्तमान. काल हौंदे हन्न।  जिंञा - 

•अम्मा खाणा बणाह्दी हौंगी।

•सैह् पढ़ा-दा हौंगा।

•गीता निहागा दी हौंगी।

(vi)    संभाव्य वर्तमान काल:- संभाव्य दा मतलब हौंदा है संभावित जाँ जिसदे हौंणे दे नेटे हौंण। क्रिया दे जिस रूप ते वर्तमान च कम्म हौयी जाणे दी संभावना हौये, तिस्सेयो संभाव्य वर्तमान काल ग्लाँदे हन्न। जिंञा -

•सैह् जांदा हो/हौये।

•सैह् आह्या हो/हौये।

•मोहन पढ़दा हो/हौये।

(ग)    भविक्ख काल ―

क्रिया दे जिस रूप ते कम्मे दे औंणे वाल़े समें च पूरा हौंणे दा पता चल्ले तिस्सेयो भविक्ख काल ग्लाँदे हन्न। इसते अग्गैं औंणे वाल़े समें पता चलदा है।  दूजेयाँ अक्खराँ च ― क्रिया दे जिस रूप ते कम्मे दा औंणे वाल़े समें च करना जाँ हौंणा जाहिर हौये, सैह् भविक्ख काल कहाँदा है। जिंञा -

•मैं कल स्कूल जाणा है।

•असाँ सर्कस दिक्खणा जाणा है।

•तिस कल घरे जो जाणा है।

भविक्ख काल दियाँ किसमां ―

भविक्ख काल दियाँ तिन्न किसमां हौंदियाँ हन्न, जेह्ड़ियाँ इस तरहाँ हन्न -

(i)      सादा भविक्ख काल

(ii)     संभाव्य भविक्ख काल

(iii)    शर्ती भविक्ख काल

(i)     सादा भविक्ख काल:- क्रिया दे जिस रूप ते कम्मे दा भविक्ख च आमतौर पर हौंणे दा पता लग्गे, तिस्सेयो सादा भविक्ख काल बोलदे हन्न। जिन्हाँ वाक्याँ दे अंत च णा है, णी है बगैरा औंदे हन्न, सैह् सादा भविक्ख काल क्हाँदे हन्न।  जिंञा - 

•तिस गीत गाणा है।

•बच्चेयाँ खेलणा जाणा है।

•तिन्नी अखबार बेचणी है।

(ii)     संभाव्य भविक्ख काल:- क्रिया दे जिस रूपे ते, अग्गैं कम्म हौंणे जाँ करने दी संभावना दा पता लग्गे, तिस्सैयो संभाव्य भविक्ख काल बोलदे हन्न। कम्मे दे हौंणे दा सही-सही पता नीं चलदा। इस च कुसी कम्मे दी, औंणे वाल़े समें च हौंणे दी संभावना हौंदी है। जिंञा -

•शायद चोर पकड़ोयी जाए।

•होयी सकदा कि मैं कल तित्थू जाँ।

•इम्तिहानें शायद मेरे बद्धिया नंबर आयी जाण।

उप्पर लिक्खेयाँ वाक्याँ च कम्मे दे भविक्ख च हौंणे दी उम्मीद है। एह् पूरी हौंगी, पक्का पता नीं। इस ताँईं एह् संभाव्य भविक्ख काल दियाँ क्रियाँ हन्न।

(iii)    शर्ती भविक्ख काल:- क्रिया दे जिस रूप ते इक कम्मे दा पूरा हौणा, औंणे वाल़े समें च हौणे वाल़े होरसी कम्मे पर डिपेंड करे, तिस्सेयो शर्ती भविक्ख काल ग्लाँदे हन्न। जिंञा - 

•जेकर छुट्टियाँ हौंगियाँ ताँ मैं दिल्ली जाणा है।

•जे तुसाँ मेहनत करह्गे ताँ फल़ जरूर मिलणा है।

•सैह् पढ़ह्गा ताँ कामयाब हौंगा।

― भगत राम मंडोत्रा

◆◆◆◆◆◆◆